Ný og opnari Facebook-síða og fyrirspurn um kartöfluniðursetningavél af Fergusongerð
Vorum að setja upp þessa nýju FACEBOOK síðu undir nafninu “Fergusonfélags-grúppan”.
Hún er öllum opin sem vilja tengast henni. Hver og einn getur sett inn efni, fyrirspurnir og myndir og þetta efni á að vera öllum aðgengilegt 
og opið til umræðu. Eldri síðan var ekki nægilega vinsamleg í því tilliti.
Við minnum líka á að lögum Fergusonfélagsins var breytt á síðasta aðalfundi svo það eina í þeim sem tengt er Ferguson og afkomendum hans er nafn félagsins.
Við teljum að það sé orðið vel þekkt í “bransanum” og allir viti að það tengist gömlum dráttarvélum svona almennt.
Á myndinni sjáum við Mf 135, DT20 frá Rússlandi (“Rússu”), Ferguson TEA 20, BMC og International vél. Þarna eru þær í sátt og samlyndi í flugskýli upp á Tungubökkum kvöldið fyrir “Wings and Wheels” sem Fergusonfélagið er aðili að.
Hvetjum ykkur til að líta við hér á “Fergusonfélags-grúppunni” og tjá ykkur um uppátækið og setja inn ykkar efni og fyrirspurnir.
Siggi Skarp er þegar byrjaður að nota hana og setti þetta inn:
Fyrir nokkrum árum var gerð upp Ferguson kartöfluupptökuvél sem nú er varðveitt á Landbúnaðarsafni Íslands á Hvanneyri.
Rökréttara hefði verið að byja á að gera upp niðursetningarvél en þær virðast ekki vera margar ofanjarðar.
Þess vegna spyrjum við nú eftir slíkri vél, ef hún skildi fyrirfinnast og vera föl til uppgerðar og varðveislu.